2005/06/28

 

بوش يعد بإنهاء التعذيب في العالم



في محاولة من واشنطن لتجميل وجهها الذي مزقته الاتهامات بالتعذيب و انتهاك حقوق الإنسان في العراق وأفغانستان و كل أنحاء العالم
وغض الطرف عن عمليات التعذيب التي تتم إما بتصريح مباشر منهم أو ضمني
يحاول بوش أن يقول للعالم أن إدارته مع إنهاء التعذيب . و بالتأكيد سيحاول أيجاد كبش فداء لحفظ ماء وجهه لكن الضحايا لن يكونوا عملاء
المخابرات الأمريكية لكن كبش الفداء سيكون زبانية التعذيب في بعض الدول التي اشتهرت بان التعذيب صار منهاجا في سجونها و على
رأس القائمة تأتى مصر حيث أشار بكل وضوح في خطابه إلى أن النساء لا يقبلن الإهانة والإذلال
باختصار بوش يحاول تجميل وجه إدارته القبيح بصفع الحكومة المصرية على قفاها
فهل يتعظ زبانية التعذيب و يقدمون المطلوبين للمحاكمة بدلا من أن تأتى أمريكا لتأديب الجميع؟
الرئيس الأمريكي جورج بوش التي وجهت إلى إدارته العديد من الاتهامات
حول تعذيب السجناء في أبو غريب و جوانتينامو و تسليم المشتبه فيهم بتهم الإرهاب إلى دول أخرى لتقوم بتعذيبهم
أعلن يوم الاثنين 27 يونيو أن الولايات المتحدة ملتزمة بإلغاء التعذيب في كل أنحاء العالم
في خطابه بمناسبة اليوم العالمي لمساندة ضحايا التعذيب قال بوش : أن التحرر مكن التعذيب حق إنساني لا يمكن الاستغناء عنه , و نحن ملتزمون ببناء عالم تحترم فيه حقوق الإنسان و يحكمه القانون و يحميه

الاتهامات بتعذيب السجناء في أبو غريب و العراق و أفغانستان
و التسهيلات التي تمنحها الولايات المتحدة الأمريكية لاعتقال في سجن جوانتينامو بكوبا أثارت التساؤلات حول سياسات بوش و إدارته في
معاملة السجناء الأجانب

كما أن الولايات المتحدة تواجه الآن اتهامات بإرسال السجناء إلى دول لها سجل حقوق إنسان متدني لتعذيبهم في سجونها و منها مصر
و من الممكن أن يكون لقرار القاضي الايطالي بإلقاء القبض على 13 عميل من المخابرات الأمريكية دخل في هذه التصريحات
ففي مارس من هذا العام أعلن المدعى العام ألبرتو جونزالس أن الولايات المتحدة ترسل المتهمين لتعذيبهم في دول لا تحترم حقوق الإنسان

و قال بوش : إن أمريكا لن تحاول التظاهر بأن المسجونين يفضلون قيودهم أو أن النساء – يقصد في مصر- يرحبن بالإهانة والإذلال
و العبودية, أو أن أي إنسان يتمنى أن يعيش تحت رحمة الجلادين
و أضاف بوش : إلى كل من يعيشون تحت وطأة الطغيان و فقدان الأمل يجب أن تعلموا أن الولايات المتحدة لن تتجاهل قهركم و لن
تعتبره عذرا للقاهرين . و عندما تقفون للمطالبة بحريتكم سنقف إلى جواركم
هذه الورقة من خارج الدفتر .. وقد كتبتها لنا
أ / نفيسة الصباغ

2005/06/27

 

مظاهرة كنيسة العذراء في الزيتون

لا تسمح لهم بالإفلات من العقاب
أنهم لا يفرقون بين عرضي وعرضك.. كلها مباحة لهم
كل أربعاء نُذكر الناس وأنفسنا بجرائمهم و بمطالبنا
الأربعاء 29/6/2005
نحتشد بشارع طومان باي أمام كنيسة العذرا في السادسة مساء
من أجل حياة كريمة لنا ولأولادنا
أنزل محطة مترو "حلمية الزيتون" وتوجه يميناً. لو توهت أسأل عن كنيسة العذرا.. معروفة جداً هناك .. ستجدها في الشارع العمودي على المحطة.. تقاطع شارع طومان باي مع شارع سنان
نرحب بإصطحاب الأطفال معكم

2005/06/20

 

قصائد من أجل التغيير

بمـناســبـة الـزيـــارة
بمـناســبـةالـزيـــارة
والـمعـونة والسـفـارة
حد فيكو يجيب أمارة
إننا عايشين في مصر

مصر دي شركة مساهمة
إن عـشـقـتها تـبقى تـهـمة
وإن سرقت هتبقى عظمة
هي دي بقى تـبقى مـصر

من سرور للعادلي وكسة
يعـملوا ميت ألـف نـكـسة
يـظـبطولهم كـام مـناقصة
لاجل تاني يـبـيـعوا مصر

والريــاســــة شــئ مـهـم

شــئ لـزوم الشـئ يا عـم
بـس يـبـقـى عـنــــــده دم
يسـتـقـيل من أجل مــصر

كل يوم يـبني في كـباري
حــــد فاهــم حــــد داري
كـله رايـح في الـمجـاري
لاجل ينـضـف اسم مـصر

والـعـزيـــزة كـونــدلــيزا
ليـــها شـأن وليـــها مـيزة
لـمـا بــتـفــوت بــريــــزة
نـدعـي ليها في كل مـصر

بالـمـعـونــة جايــة رايحة
والـمـذلــة ريحتــها فايحة
كل واحـد يــقــرا فاتــحـة
رحــمــة على اسم مـصر


حضرة الظابط



يا عم قول لحضرة الظابط اللي واقف هناك يمشي
البدلة سودا والعتمة مش عايزة ليه تمشي
قوله خلاص
كل الزنازين اتملت بناس عبيطة
وهبلة في حب الوطن
قوله خلاص
لا الميتين راح يصحوا
ولا الصاحيين راح يقلقوا الحراس
يا خنقة الزنزانة والدنيا براح بره
على البورش قلبك والوطن يتصاحبوا
تفتح له حضنك مرة
يفتح لك الزنزانة مليون مرة
يا عم قول لحضرة الظابط اللي واقف هناك
ليه واقف على صوتي
مستني ليه موتي
قوله
لا الذل غاية
ولا جوايا
غير العشق للأوطان
ومهما زادت الأحزان
وفارقنا الطريق الصح
ومهما الليل بيرمينا
في زنزانة
ما بين خونة وسجانة
هيطلع تاني لينا الصبح
وهنغني
وكل الدنيا تسمعنا
وإيه معنى الوطن والفرح
ما دام العين ما تحلمشي
يا عم قول لحضرة الظابط اللي واقف هناك يمشي
البدلة سودا والعتمة مش عايزة ليه تمشي
قوله خلاص
لا عمرنا هنخاف من دقة الباب
في عز البرد ولا التفتيش
ولا صحبة تتقابل
متغميين في الفجر
يطلع غناهم من وسط ألف شاويش
ولا حد يسمعشي
يا عم قول لحضرة الظابط اللي واقف هناك يمشي
البدلة سودا والعتمة مش عايزة ليه تمشي
قوله
عمر الوطن ما كان إذاعة
ولا جرنان
ولا تاجر بأحلامنا
عمر الوطن ما كان ظابط
ولا مخبر بيتصنت بكل حقارة لكلامنا
يا عم يا للي بتعشق العتمة
تتخفى في الزحمة
تسمع كلامي وتقوله لأسيادك
كلمة بكلمة يححببوك في الخوف
ويفرحوك بنيشان وطن كداب
لا هوه علاك ولا زادك
يا عم ياللي بتعشق العتمة
وبتتخفى في الزحمة
عمر بلادنا ما كانت في الحقيقة بلادك
ولا عمرك هتفهمنا
ولا هتحس بمعنى الوطن في كلامنا
طول ما أنت قلبك سجن مفتوح بابه
يحمي اللي خان
ويدلل على كلابه


الشاعر / محمود العدوي
شباب من أجل التغيير
أجيال عاشت عمرها في ظل الطوارئ

لا فضل لي في هذا الموضوع سوى القص واللزق بس أنا ناوي أواظب على الحكاية دي
وأنشر كل اللي يوصلني من قصايد في نفس الموضوع ده
تحياتي العطرة

2005/06/19

 

أربع صفحات لأبداع الشباب

solo / ببساطة أنا أعد الآن لصفحات إبداع فى مجلة شبابية أسمها سولو
معنية بالمرحلة العمرية من 15 إلى 25
طبعا مش معنى كده أن المرحلة دى بس اللى تكتب لنا ، أنا شخصيا تخطيت المرحلة دى و مش هقول عندى كام سنة.. المهم أنى أحب الكل يشارك معايا، مش عايزه المسألة تتحدد بأصحابى و معارفى كالعادة فى صفحات الإبداع المعروفة
اللى بيكتب قصة أو شعر أو بيرسم أو بيكتب خواطر أو يوميات، أو حتى عايز ينشر حاجه قرأها و حبها و عايز غيره يقرأها، المهم كل ما كانت المادة قصيرة كان أفضل لأننا محددين بأربع صفحات
أول عدد أنا هعلق على المادة المنشورة، مش نقد لكن محاولة لمحاورة النص ببساطة، هعلق على كونديرا زى ما هعلق على رامى و على إمبرتوإيكو زى ما هعلق على سمر.. أسمحولى أشاغب لوحدى فى أول عدد لكن بعد الإصدار الاول من حق الجميع المشاغبة
يعنى كله يعلق على أى حاجة عجبته أو ما عجبتوش حتى عليه أنا شخصيا
يعنى كلنا هنلعب مع بعض و نعمل صفحات أتمنى أنها تعبر عنا.. باختصار عايزه ناس تتجنن معايا شويه.. و بس
سمر نور
محرر صفحات الأدب فى أول عدد من سولو
برجاء أرسالة المادة المراد نشرها على العنوان بالاسفل
Summernour@yahoo.com

2005/06/14

 

مش كل اللي بتهز وسطها ... بتتنقط

في هوجة المبايعات والنفاق .. وموسم بيع الأقمشة ورواج الخطاطين
يرفع كل مكن هب ودب يافطة يعلن فيها مبايعته للسيد الرئيس لفترة رئاسة عشرتاشر ، وذلك أصالة عن نفسه ونيابة – الله أما أحفظنا – عن أفراد العائلة أو عمال المحل ؛ كما يقوم - ولا مؤاخذة – أعضاء المجالس المختلفة( محليات / محافظة / شعب / شورى ) بالمبايعة باسمهم ونيابة عن أهل الدائرة كذلك النقابات الصفراء وأصحاب الشركات الكبيرة بالمبايعة باسمهم ونيابة عن أهل الدائرة كذلك النقابات الصفراء وأصحاب الشركات الكبيرة .......... الخ
بس اللي لفت نظري المرة دي هي يافطة ركيكة متعلقة في 1 ميدان التحرير
باسم نادي النوبة العام ورئيس مجلس إدارة جمعية الشباب لتنمية جنوب الوادي
وأبناء النوبة في جمهورية مصر العربية
وكأن فجأة أصبح السادة حاكمي نادي النوبة العام ، واللي بيوصلوا لعضوية مجلس الإدارة بأصوات ناس
ما تعرفش ميدان التحرير فين ، كأن الشلة دي بقى ليها الحق في الكلام باسم كل أبناء النوبة في بر مصر
: بلاش أقول أحا .. خليني أحسن أقول
أنا مواطن مصري نوبي أرفض التجديد للرئيس الحالي محمد حسني مبارك
وأعلن كذلك أن اليافطة العقيمة المتعلقة فوق يافطة النادي نفسها لا تعبر عن رأي كل النوبيين .. بل بالكاد
تعبر عن مؤخرات أصحاب اليافطة ورغبة هذه المؤخرات في الالتصاق أكبر قدر ممكن بكراسيهم الوهمية
في الختام أوجه رسالتين
الأولى للشرفاء اللي حظهم العسر حشرهم في مجلس العملاء والمرتعشين : استقيلوا أكرم لكم ... وأربح
: والثانية للمتورطين من العملاء
...... في انتظار ردودكم ده إذا كان لسة عندكم
: ثم أهمس في أذن رئيس النادي
إذا كنت لا تعلم شيء عن هذه اليافطة المشئومة – وده مستحيل – أنصحك أنك تستقيل وما تحولش مرة
. ترشح نفسك في أي حاجة تاني
...أما لو كنت متورط – وده الأرجح – أسمح لي أقولها لك أنت وكل عملاء مجلسكم الـ
مش كل اللي بتهز وسطها ... بتتنقط

2005/06/04

 

بدون تعليق

http://misrdigital.blogspirit.com/archive/2005/05/13/المليطة_للجميع_-_أسماء_أحمد.html

هذه المقالة نشرتها جريدة الوعي المصري بتاريخ 13 مايو 2005

وباين عليها مقالة شديدة موووووووووووووووووووووت

أوعى تفوتكم

بااااااااااااااااي

 

بتحلم بأيه ؟



سؤال كنت فاكر أنه بسيط ، بس لما سحبته من أيده ونزلنا شارع الواقع لبست فـ كل عمدان النور المتاحة
. ساعتها بس عرفت مدى صعوبة السؤال
أنا لغاية النهارده لسة ما لقيتش الشاب المعجزة اللي عنده إجابة ، كل اللي سألتهم تقدر بسهولة تقسمهم معسكرين

الأولاني رد ببديهية شديدة وبإجابة موحدة هي : رّبنا يكرمني
ولما حاولت - بعد تكرار الإجابة لعشرات المرات - أن أفترض مع واحد منهم أني أنا ربنا وقررت أني أكرمه
بس مش عارف لأني ببساطة ما أعرفش هو عاوز أيه فلازم يحدد معنى الكرم بالنسبة له
بمجرد ما طرحت فرضيتي الساذجة لقيت ملامحه أتغيرت – كأنه أتحول – وكاد يحقق ذاته ( لأول مرة ) بأنه يقيم عليا الحد
.. بالعافية فهمته أنه مش ولي أمر
. وفكرته بأن َلكُم دينَكُم و ماليش دعوة


أما المعسكر التاني كان مجرد ما حد فيهم يسمع السؤال ده بياخد رد فعل – بصوته وملامحه – عنيف جداً أو متمسخر جداً أو حزين برضه جداً ويقولوا كلهم عبارة خاصة
: بالمعسكر ده
( يا عم فُكك من دين أم الحوار ده ما تفوقناش )

.. دي تجربتي الشخصية مع السؤال العجيب
: حد فيكم عنده تجارب ممكن يحكيها ، أو حد فيكم يقدر يقول
بيحلم بأيه ؟

This page is powered by Blogger. Isn't yours?